മന്‍മോഹന്‍ സിങ്ങ്. ഇന്ത്യയുടെ 13ാമത് പ്രധാനമന്ത്രി. സാമ്പത്തിക ശാസ്ത്രഞ്ജന്‍ എന്ന നിലയില്‍ പ്രസിദ്ധന്‍. ജവഹര്‍ലാല്‍ നെഹ്രുവിന് ശേഷം ആദ്യമായി അഞ്ചുവര്‍ഷ കാലാവധി തികച്ച് അധികാരത്തില്‍ തിരിച്ചെത്തിയ നേട്ടം സ്വന്തം. സിഖ് സമുദായത്തില്‍ നിന്ന് പ്രധാനമന്ത്രി പദത്തിലെത്തുന്ന ആദ്യ വ്യക്തിയാണ്. ജനനം 1932 സെപ്തംബര്‍ 26- ന് ഇന്ന്‍ പാകിസ്താനിലെ പഞ്ചാബ് പ്രവിശ്യയില്‍ ഉള്‍പ്പെടുന്ന ഗായില്‍. 1947-ല്‍ വിഭജനത്തെ തുടര്‍ന്ന് കുടുംബം ഇന്ത്യയിലേക്ക് വന്നു. ഓക്സ്ഫോര്‍ഡ് സര്‍വകലാശാലയില്‍ നിന്ന്‍ സാമ്പത്തിക ശാസ്ത്രത്തില്‍ ഗവേഷണ ബിരുദം നേടിയ ശേഷം ഐക്യരാഷ്ട്ര സഭയില്‍ 1966 മുതല്‍ മൂന്ന്‍ വര്‍ഷം പ്രവര്‍ത്തിച്ചു. 1970-കളിലും 1980-കളിലും ഇന്ത്യയില്‍ കേന്ദ്ര സര്‍ക്കാരില്‍ പ്രധാന സാമ്പത്തിക ചുമതലകള്‍ വഹിച്ചു. മുഖ്യ സാമ്പത്തിക ഉപദേഷ്ടാവ് (1972-76), റിസര്‍വ് ബാങ്ക് ഗവര്‍ണര്‍ (1982-85), പ്ലാനിംഗ് കമ്മീഷന്‍ ഉപാധ്യക്ഷന്‍ (1985-87) എന്നിവ ഇതില്‍പ്പെടും. 1991-ല്‍ പി.വി. നരസിംഹ റാവു മന്ത്രിസഭയില്‍ ധനകാര്യ മന്ത്രിയായി. രാജ്യം നേരിട്ടിരുന്ന സാമ്പത്തിക പ്രതിസന്ധിയുടെ പശ്ചാത്തലത്തില്‍ സമ്പദ് വ്യവസ്ഥയില്‍ ഉദാരവല്‍ക്കരണ നടപടികള്‍ക്കും ഘടനാപരമായ പരിഷ്കാരങ്ങള്‍ക്കും തുടക്കം കുറിച്ചു. 1998 മുതല്‍ 2004 വരെ രാജ്യസഭയില്‍ പ്രതിപക്ഷ നേതാവായിരുന്നു. 2004-ല്‍ കോണ്‍ഗ്രസ് നേതൃത്വത്തിലുള്ള ഐക്യ പുരോഗമന സഖ്യ (യു.പി.എ) സര്‍ക്കാറില്‍ അധികാരത്തില്‍ വന്നതിനെ തുടര്‍ന്ന് പ്രധാനമന്ത്രിയായി തെരഞ്ഞെടുക്കപ്പെട്ടു. സഖ്യം അധ്യക്ഷ സോണിയാ ഗാന്ധി സ്ഥാനം നിരസിച്ചതിന്റെ പശ്ചാത്തലത്തില്‍ ആയിരുന്നു സിങ്ങിന്റെ അധികാരലബ്ധി. 2009 പൊതുതിരഞ്ഞെടുപ്പില്‍ യു.പി.എ വര്‍ധിത ഭൂരിപക്ഷത്തോടെ അധികാരത്തില്‍ തിരിച്ചെത്തിയപ്പോള്‍ മന്‍മോഹന്‍ സിങ്ങ് പ്രധാനമന്ത്രിയായി തുടര്‍ന്നു.