പാകിസ്ഥാന്‍ ഒരു തീവ്രവാദ രാഷ്ട്രമായി മാറിയിരിക്കുകയാണെന്നും തീവ്രവാദത്തെ രാഷ്ട്രനയമായി ഉപയോഗിക്കുക വഴി യുദ്ധക്കുറ്റമാണ് പാകിസ്ഥാന്‍ ചെയ്യുന്നതെന്നും ഇന്ത്യ. ന്യൂയോര്‍ക്കില്‍ ഐക്യരാഷ്ട പൊതുസഭയെ അഭിസംബോധന ചെയ്യവേ കശ്മീര്‍ പ്രശ്നം ഉന്നയിച്ച പാകിസ്ഥാന്‍ പ്രധാനമന്ത്രി നവാസ് ഷെരിഫിനുള്ള മറുപടിയിലാണ് ഇന്ത്യയുടെ രൂക്ഷ പ്രതികരണം. തക്ഷശിലയുടെ നാട് തീവ്രവാദത്തിന്റെ ഐവി ലീഗ് ആയി മാറിയിരിക്കുകയാണെന്നും തീവ്രവാദികളെ നിര്‍ബാധം വിഹരിക്കാന്‍ പാകിസ്ഥാന്‍ അനുവദിക്കുകയാണെന്നും ഇന്ത്യ കുറ്റപ്പെടുത്തി.
ഐക്യരാഷ്ട പൊതുസഭയില്‍ നടത്തിയ അഭിസംബോധനയില്‍ ഇന്ത്യന്‍ സുരക്ഷാ സൈനികരുമായുള്ള ഏറ്റുമുട്ടലില്‍ കൊല്ലപ്പെട്ട ഹിസ്ബുള്‍ മുജാഹിദ്ദീന്‍ കമാണ്ടര്‍ ബുര്‍ഹാന്‍ വാനിയെ പ്രകീര്‍ത്തിച്ച നവാസ് ഷെരിഫ് സ്വയം നിര്‍ണ്ണയ അവകാശത്തിനായുള്ള കശ്മീരി ജനതയുടെ ആവശ്യത്തെ പൂര്‍ണ്ണമായും പിന്തുണയ്ക്കുന്നുവെന്നും കൂട്ടിച്ചേര്‍ത്തു. ഇന്ത്യയുമായി കശ്മീര്‍ വിഷയമടക്കമുള്ള തര്‍ക്കങ്ങള്‍ സമാധാനപരമായി പരിഹരിക്കുന്നതിന് ഗൌരവകരവും തുടര്‍ച്ചയുമായ സംഭാഷണത്തിന് തയ്യാറാണെന്ന് പറഞ്ഞ ഷെരിഫ് അസ്വീകാര്യമായ നിബന്ധനകള്‍ ഉയര്‍ത്തി ഇന്ത്യ ഈ ശ്രമങ്ങള്‍ മുടക്കുകയാണെന്ന് ആരോപിച്ചു.
സംഭാഷണത്തിന് മുന്‍പ് തീവ്രവാദ പ്രവര്‍ത്തനം അവസാനിപ്പിക്കണമെന്ന ഒറ്റ നിബന്ധനയേ ഇന്ത്യ മുന്നോട്ടുവെച്ചിട്ടുള്ളുവെന്നും ഇതാണോ അസ്വീകാര്യമെന്നും ഇന്ത്യയുടെ യു.എന്നിലെ പ്രതിനിധി പ്രതികരിച്ചു. ഇരുപത് മിനിട്ടോളം കശ്മീര്‍ വിഷയം പ്രതിപാദിച്ച ഷെരിഫിന്‍റെ പ്രസംഗത്തോട്‌ മറുപടി നല്‍കാനുള്ള അവകാശം വിനിയോഗിച്ചാണ് ഇന്ത്യ പ്രതികരിച്ചത്.
