അസമിലെ കോക്രജാര്‍ ജില്ലയില്‍ വ്യാഴാഴ്ച രണ്ടിടത്തുണ്ടായ ആക്രമണങ്ങളില്‍ 3 കുട്ടികളടക്കം 11 പേര്‍ കൊല്ലപ്പെട്ടു. അസമിലെ ബോഡോ ഭരണ പ്രദേശമായ ഗ്രാമത്തിലാണ് ആക്രമണമുണ്ടായത്. സായുധരായ തീവ്രവാദികള്‍ രാത്രി ഒരു മണിയോടെ രണ്ട് വീടുകളില്‍ നുഴഞ്ഞുകയറി വെടിവെക്കുകയായിരുന്നു. ഏഴുപേര്‍ സംഭവസ്ഥലത്ത് വെച്ചു തന്നെ മരിച്ചു. വെടിയേറ്റ രണ്ട് പുരുഷന്മാരുടെ നില അതീവ ഗുരുതരമായി തുടരുകയാണ്.
ഗോരേശ്വര്‍ പോലിസ് സ്‌റ്റേഷന്‍ അതിര്‍ത്തിയിലുള്ള ബാലപരഞ്ജന്‍ ഗ്രാമത്തിലെ രണ്ടു വീടുകള്‍ക്കു നേരെയാണ് ആക്രമണമുണ്ടായത്. വ്യാഴാഴ്ച തന്നെ ബക്‌സ ജില്ലയിലുണ്ടായ ആക്രമണത്തില്‍ ഒരു കുടുംബത്തിലെ മൂന്നു പേരാണ് കൊല്ലപ്പെട്ടത്. വെടിയേറ്റ പിഞ്ചുകുഞ്ഞിനെ ആശുപത്രിയില്‍ പ്രവേശിപ്പിച്ചിരിക്കുകയാണ്. തിരച്ചില്‍ നടത്തുന്നതിനായി മേഖലയിലേക്ക് കൂടുതല്‍ സൈന്യത്തെ അയയ്ക്കണമെന്ന് അസം സര്‍ക്കാര്‍ കേന്ദ്രത്തോട് ആവശ്യപ്പെട്ടിട്ടുണ്ട്. 2012 മുതല്‍ കോക്രജാറില്‍ ബോഡോ ഗോത്രവാസികളും മുസ്ലീങ്ങളും തമ്മില്‍ നടന്ന ഏറ്റുമുട്ടലില്‍ നിരവധി പേര്‍ കൊല്ലപ്പെട്ടിട്ടുണ്ട്.
ബംഗ്ലാദേശില്‍ നിന്നും കുടിയേറിയ മുസ്ലീങ്ങള്‍ക്കു നേരെ ബോഡോ ലാന്‍ഡ് പ്രവര്‍ത്തകര്‍ ആക്രമണം നടത്തുന്നത് പതിവായിരിക്കുകയാണ്. അതിജീവനത്തിനുവേണ്ടിയുള്ള പോരാട്ടമായാണ് ബോഡോ ലാന്‍ഡ് പ്രവര്‍ത്തകര്‍ ഈ ആക്രമണങ്ങളെ വിശേഷിപ്പിക്കുന്നത്. അനിയന്ത്രിതമായി കുടിയേറ്റക്കാര്‍ കടന്നുവരുന്നത് മേഖലയില്‍ സാമ്പത്തികവും രാഷ്ട്രീയവുമായ ഒട്ടേറെ പ്രശ്‌നങ്ങളുണ്ടാക്കുന്നുണ്ട്. വോട്ടിനുവേണ്ടി രാഷ്ട്രീയ പാര്‍ട്ടികള്‍ കുടിയേറ്റത്തെ പ്രോത്സാഹിപ്പിക്കുകയാണെന്ന ആക്ഷേപവും സംഘടനകള്‍ പലപ്പോഴായി ഉയര്‍ത്തിയിട്ടുണ്ട്.
