മദ്യലഹരിയിലുള്ള ഉപദ്രവം സഹിക്കാനാവാതെ പെണ്‍മക്കള്‍ അച്ഛനെ കൊലപ്പെടുത്തി. ഹൈദരാബാദ് ജഗദ്ഗിരിഗുട്ട സ്വദേശിയായ 45കാരനാണ് കൊല്ലപ്പെട്ടത്. സംഭവത്തില്‍ 17ഉം 16ഉം വയസുള്ള പെണ്‍കുട്ടികളെ പോലീസ് കസ്റ്റഡിയിലെടുത്തു. രാവിലെ വീട്ടിലെത്തിയ ബന്ധുവാണ് 45കാരനെ മരിച്ചനിലയില്‍ കണ്ടെത്തിയത്. തുടര്‍ന്ന് പോലീസില്‍ വിവരം അറിയിക്കുകയായിരുന്നു.
കഴിഞ്ഞദിവസം രാത്രിയും അച്ഛന്‍ മദ്യപിച്ചാണ് വീട്ടിലെത്തിയത്. തുടര്‍ന്ന് മദ്യലഹരിയില്‍ ഉറങ്ങുന്നതിനിടെ ശ്വാസംമുട്ടിച്ച് കൊലപ്പെടുത്തിയെന്നാണ് പെണ്‍കുട്ടികളുടെ മൊഴി.കസ്റ്റഡിയിലെടുത്ത പെണ്‍കുട്ടികളെ ജുവനൈല്‍ ജസ്റ്റിസ് ബോര്‍ഡിന് മുമ്പാകെ ഹാജരാക്കും.
അച്ഛന്റെ ഉപദ്രവം സഹിക്കാന്‍ വയ്യാതായതോടെയാണ് കൊലപാതകം നടത്തിയതെന്നാണ് ഇവരുടെ മൊഴി. എട്ട് മാസം മുമ്പാണ് പെണ്‍കുട്ടികളുടെ അമ്മ മരിച്ചത്. ഇതിനുശേഷം മദ്യപാനിയായ അച്ഛന്‍ പെണ്‍കുട്ടികളെ ഉപദ്രവിക്കുന്നത് പതിവായിരുന്നു. മദ്യലഹരിയില്‍ ശാരീരികമായി മര്‍ദിക്കുകയും അസഭ്യം പറയുകയും മോശമായരീതിയില്‍ പെരുമാറുന്നതും പതിവായിരുന്നു.
