കോഴിക്കോട് ചാത്തമംഗലം പഞ്ചായത്തില് നിപ ബാധിച്ച് മരിച്ച കുട്ടിയുടെ റൂട്ട് മാപ്പ് ജില്ലാഭരണകൂടം തയ്യാറാക്കി. കുട്ടിയുടെ അമ്മയ്ക്കും നേരിയ പനി ലക്ഷണമുണ്ട്. സ്വകാര്യ ആശുപത്രികളോട് അസ്വാഭാവികമായ പനി ലക്ഷണങ്ങളുമായി വരുന്ന കേസുകള് അറിയിക്കാന് ആവശ്യപ്പെട്ടതായി ആരോഗ്യമന്ത്രി അറിയിച്ചു. നാളെ വൈകീട്ട് അവലോകനയോഗം ചേരും. മെഡിക്കല് കോളേജിലെ ഐസിയു ബെഡുകളുടെ കുറവ് പരിഹരിക്കും. ഹൈറിസ്കില് ഉള്ള 20 പേരുടെയും സാമ്പിള് എന്.വി.ഐയിലേക്ക് അയക്കും. മെഡിക്കല് കോളേജ് പേ വാര്ഡ് ബ്ളോക് നിപ്പാ വാര്ഡാക്കുമെന്നും മന്ത്രി വിശദീകരിച്ചു.
ഓഗസ്റ്റ് 27 മുതല് സെപ്റ്റംബര് 1 തിയ്യതി വരെയുള്ള ദിവസങ്ങളിലെ കുട്ടിയുടെ റൂട്ട് മാപ്പാണ് പുറത്തുവിട്ടത്. ഓഗസ്റ്റ് 27 ന് അയല്വാസികളായ കുട്ടികള്ക്ക് ഒപ്പം കളിച്ചു. ഓഗസ്റ്റ് 29 ന് രാവിലെ 8.30 മുതല് 8.45 വരെ എരഞ്ഞിമാവിലെ ഡോ.മുഹമ്മദ്സ് സെന്ട്രല് എന്ന സ്വകാര്യ ക്ലിനിക്കില് ചികിത്സക്ക് എത്തി. ഓഗസ്റ്റ് 31 ന് മുക്കം, ഓമശേരി എന്നിവിടങ്ങളിലെ സ്വകാര്യ ആശുപത്രികളില് ഓട്ടോയില് ചികിത്സക്ക് എത്തി. ഉച്ചക്ക് മെഡിക്കല് കോളേജില് എത്തി. അവിടെ നിന്നും സെപ്തബര് 1 ന് കോഴിക്കോട്ടെ സ്വകാര്യ ആശുപത്രി. പിന്നീടുള്ള ദിവസങ്ങളില് അവിടെ തുടര്ന്നു.
നിപ ബാധിച്ച് മരിച്ച കുട്ടിയുടെ സമ്പര്ക്കപ്പട്ടിക വിപുലപ്പെടാനുള്ള സാധ്യതയുണ്ടെന്ന് മാധ്യമപ്രവര്ത്തകരുടെ ചോദ്യത്തിന് മറുപടിയായി മന്ത്രി പറഞ്ഞു.