സംസ്ഥാനത്ത് കൂടുതല് കൊവിഡ് നിയന്ത്രണങ്ങള് ഏര്പ്പെടുത്തില്ല. നിലവിലെ നിയന്ത്രണങ്ങള് തുടരാനും മുഖ്യമന്ത്രിയുടെ നേതൃത്വത്തില് ഇന്ന് ചേര്ന്ന കൊവിഡ് അവലോകന യോഗത്തില് തീരുമാനമായി. ഞായറാഴ്ച ലോക്ക്ഡൗണില് മാറ്റമില്ല. കടകള്ക്ക് 7 മുതല് 9 വരെ തന്നെ പ്രവര്ത്തിക്കാം. ഡബ്ല്യു.ഐ.പി.ആര് മാനദണ്ഡത്തില് മാറ്റമില്ല. ഇടുക്കി, പാലക്കാട്, കാസര്ഗോഡ് ജില്ലകളില് ബ്രേക്ക് ത്രൂ ഇന്ഫെക്ഷനുകള് അഞ്ച് ശതമാനത്തില് കൂടുതലാണ്. ഈ ജില്ലകളില് ജനിതക പഠനം നടത്താന് ആരോഗ്യവകുപ്പിനോട് മുഖ്യമന്ത്രി നിര്ദ്ദേശിച്ചു. ഓരോ തദ്ദേശ സ്ഥാപന അതിര്ത്തിയിലും എത്ര വാക്സിനേഷനുകള് നടത്തിയിട്ടുണ്ടെന്ന് റിപ്പോര്ട്ട് സമര്പ്പിക്കാനും നിര്ദേശമുണ്ട്.
സംസ്ഥാനത്ത് അടുത്ത നാലാഴ്ച അതീവ ജാഗ്രത വേണമെന്ന് ആരോഗ്യ വകുപ്പ് നിര്ദ്ദേശം നല്കിയിട്ടുണ്ട്. ഓണക്കാലത്ത് പലയിടങ്ങളിലും ആള്ത്തിരക്ക് ഉണ്ടായിട്ടുണ്ട്. ഇളവ് നല്കിയ വ്യാപാര സ്ഥാപനങ്ങള്, കടകള് എന്നിവിടങ്ങളില് പലയിടത്തും ആള്ക്കൂട്ടം ഉണ്ടായി. കൊവിഡ് മാനദണ്ഡങ്ങള് കൃത്യമായി പാലിക്കണമെന്ന് നിര്ദേശം നല്കിയിരുന്നെങ്കിലും എല്ലായിടത്തും അത് പാലിക്കപ്പെട്ടില്ലെന്നും ആരോഗ്യവകുപ്പ് ഇന്നലെ ഇറക്കിയ വാര്ത്താകുറിപ്പില് കുറ്റപ്പെടുത്തിയിരുന്നു. അതീവ വ്യാപനശേഷിയുള്ള ഡെല്റ്റ വൈറസിന്റെ ഭീഷണിയിലാണ് സംസ്ഥാനത്തെ പല പ്രദേശങ്ങളും. കൊവിഡ് മൂന്നാം തരംഗത്തിന്റെ ഭീഷണിയും നിലനില്ക്കുന്ന സാഹചര്യത്തില് ഓണാവധി കഴിഞ്ഞ് സ്ഥാപനങ്ങളും ഓഫീസുകളും തുറക്കുമ്പോള് അതീവ ജാഗ്രത പാലിക്കണമെന്നും ആരോഗ്യ വകുപ്പ് മന്ത്രി നിര്ദ്ദേശിച്ചിട്ടുണ്ട്.
പരമാവധി പേര്ക്ക് വാക്സീന് നല്കി സുരക്ഷിതമാക്കാനുള്ള ശ്രമത്തിലാണ് സംസ്ഥാന സര്ക്കാര്. വാക്സീന് എടുത്തു എന്ന് കരുതി ആരും ജാഗ്രത കൈവിടരുതെന്നും ആരോഗ്യമന്ത്രി നിര്ദ്ദേശിച്ചു. വാക്സീന് എടുത്തവര് മുന്കരുതലുകളെടുത്തില്ലെങ്കില് അവരിലൂടെ ഡെല്റ്റ വകഭേദം കൂടുതലായി വ്യാപിക്കുമെന്നാണ് അടുത്ത കാലത്തുണ്ടായ പഠനങ്ങള് സൂചിപ്പിക്കുന്നത്. അതിനാല് എല്ലാവരും ശ്രദ്ധിക്കണമെന്നും മന്ത്രി നിര്ദ്ദേശിച്ചു.
നിലവില് സംസ്ഥാനത്തിന്റെ പക്കല് പതിനാറ് ലക്ഷം സിറിഞ്ചുകള് ലഭ്യമാണ്. കൂടുതല് സിറിഞ്ചുകള് ലഭ്യമാക്കാനും സമാഹരിക്കാനും നടപടിയെടുക്കും. പത്ത് ലക്ഷം വാക്സിന് ഡോസുകള് കെ.എം.എസ്.സി.എല് നേരിട്ട് വാക്സിന് ഉത്പ്പാദകരില് നിന്ന് വാങ്ങിയിട്ടുണ്ട്. സ്വകാര്യ ആശുപത്രികളും മറ്റു സ്വകാര്യ സ്ഥാപനങ്ങളും വഴി ഇത് നല്കുന്നുണ്ടെന്ന് ഉറപ്പു വരുത്തണമെന്നും മുഖ്യമന്ത്രി നിര്ദേശം നല്കിയിട്ടുണ്ട്.