സി.പി.ഐ.എം നിയമസഭാ കക്ഷിയോഗത്തില് മുഹമ്മദ് റിയാസിനെതിരെ എം.എല്.എമാരുടെ രൂക്ഷ വിമര്ശനം. എം.എല്.എമാരുടെ ശുപാര്ശയുമായി കരാറുകാര് മന്ത്രിയുടെ മുന്നിലേക്ക് വരരുതെന്ന നിയമസഭയിലെ പരാമര്ശത്തിനെതിരെയാണ് എം.എല്.എമാര് രൂക്ഷ വിമര്ശനമുന്നയിച്ചത്. ഒക്ടോബര് ഏഴിന് നിയമസഭയിലാണ് എം.എല്.എമാര്ക്കെതിരെ റിയാസ് വിമര്ശനമുന്നയിച്ച് രംഗത്തെത്തിയത്. എം.എല്.എമാരുടെ വിമര്ശനത്തിന് പിന്നാലെ പരാമര്ശം തെറ്റായി പോയെന്ന് റിയാസ് പറഞ്ഞു.
കരാറുകാരെ ശുപാര്ശയുമായി മന്ത്രിയുടെ അടുക്കലേക്ക് വിടുന്നത് എം.എല്.എമാര് ഒഴിവാക്കണം. അല്ലെങ്കില് പിന്നീടിത് മറ്റു പല വിഷയങ്ങള്ക്കും വഴിവെക്കുമെന്ന റിയാസിന്റെ പരാമര്ശത്തിനെതിരെയാണ് എം.എല്.എമാര് രംഗത്തെത്തിയത്.
എ.എന് ഷംസീറാണ് ആദ്യം വിമര്ശനവുമായി രംഗത്തെത്തിയത്. ഇതിന് പിന്നാലെ കടകം പള്ളിസുരേന്ദ്രനും കെ. വി സുമേഷും റിയാസിനെതിരെ വിമര്ശനമുന്നയിച്ചു. ഇതിനിടെ പാര്ലമെന്ററി പാര്ട്ടി സെക്രട്ടറി ടി.പി രാമകൃഷ്ണന് മന്ത്രിയെ അനുകൂലിച്ചുകൊണ്ടും രംഗത്തെത്തി.