ആയുര്വേദത്തെ ലോകത്തിന്റെ നെറുകയില് എത്തിച്ച മഹാവൈദ്യന് ഡോ. പി.കെ വാരിയര്(100) അന്തരിച്ചു. ശനിയാഴ്ച ഉച്ചയോടെയായിരുന്നു അന്ത്യം. ജൂണ് എട്ടിനായിരുന്നു അദ്ദേഹം നൂറാം പിറന്നാള് ആഘോഷിച്ചത്. ജന്മദിനം ആഘോഷിക്കുന്ന സമയത്ത് ഡോ.പി.കെ വാര്യര് കൊവിഡ് ബാധിതനായിരുന്നു. പിന്നീട് അദ്ദേഹം കൊവിഡ് മുക്തി നേടിയെങ്കിലും മൂത്രത്തിലെ അണുബാധയെ തുടര്ന്ന് വീണ്ടും ആശുപത്രിയില് പ്രവേശിപ്പിച്ചു. ബുധനാഴ്ച ആശുപത്രിയില് നിന്നും ഡിസ്ചാര്ജ് ചെയ്തെങ്കിലും ശനിയാഴ്ച ഉച്ചയ്ക്ക് 12.25-ഓടെ മരണം സംഭവിക്കുകയായിരുന്നു. പത്മശ്രീ, പത്മഭൂഷണ് എന്നീ ബഹുമതികള് നല്കി രാജ്യം അദ്ദേത്തെ ആദരിച്ചിരുന്നു.
മലപ്പുറം ജില്ലയിലെ കോട്ടക്കലിനെ ആ?ഗോളപ്രശസ്തമായ ആയുര്വേദ പോയിന്റാക്കി മാറ്റിയതില് അദ്ദേഹം നിര്ണായക പങ്കുവച്ചിരുന്നു. ആര്യവൈദ്യശാലയുടെ സ്ഥാപകനായ ഡോ.പി.എസ്.വാര്യരുടെ അനന്തരവനായ പി.കെ.വാര്യര് അമ്മാവന് തുടങ്ങിവച്ച സ്ഥാപനത്തെ അന്താരാഷ്ട്ര തലത്തിലേക്ക് വളര്ത്തി എടുത്തു.
ആയുര്വേദത്തിന് ശാസ്ത്രീയ മുഖം നല്കിയ പ്രതിഭ എന്ന നിലയിലാണ് ചരിത്രം ഡോ.പി.കെ. വാര്യരെ അടയാളപ്പെടുത്തുന്നത്. സ്മൃതി പര്വ്വം എന്ന പി.കെ. വാര്യരുടെ ആത്മകഥക്ക് കേരള സാഹിത്യ അക്കാദമി പുരസ്കാരം ലഭിച്ചിട്ടുണ്ട്. ഇന്ത്യയിലെമ്പാടും പിന്നീട് രാജ്യത്തിന് പുറത്തേക്കും കോട്ടക്കല് ആര്യവൈദ്യശാലയുടെ പ്രവര്ത്തനം വ്യാപിപ്പിച്ചത് ഡോ.പി.കെവാര്യരാണ്. 1999-ല് പത്മശ്രീയും 2009-ല് പത്മഭൂഷണും നല്കി രാജ്യം ആ വൈദ്യരത്നത്തെ ആദരിച്ചു. ആയുര്വേദത്തിന്റെ മറുകര കണ്ട ആ ജ്ഞാനിയെ ഡിലിറ്റ് ബിരുദം നല്കി കോഴിക്കോട് സര്വ്വകലാശാലയും അനുമോദിച്ചു. ആയുര് വേദത്തെ ചികിത്സയ്ക്ക് ശാസ്ത്രീയ ചിട്ടയും ക്രമവും ഒരുക്കുന്നതിലും ആധുനിക മെഡിക്കല് സയന്സിനെ അംഗീകരിച്ചു കൊണ്ട് രണ്ട് ചികിത്സാ ധാരകള്ക്കും ഒത്തു ചേര്ന്നു പ്രവര്ത്തിക്കാനുള്ള സാധ്യതകള് പരിശോധിക്കണമെന്നും അദ്ദേഹം അഭിപ്രായപ്പെട്ടിരുന്നു.