.jpg)
തമിഴ്നാട്ടിലെ കുംഭകോണത്ത് പടക്ക നിര്‍മാണശാലക്കു തീപിടിച്ച് എട്ടുപേര്‍ മരിച്ചു. പന്ത്രണ്ടുപേര്‍ക്ക് ഗുരുതരമായി പരുക്കേറ്റു. വെള്ളിയാഴ്ച രാവിലെയാണ് സംഭവം. പരുക്കേറ്റവരെ സമീപത്തെ ആശുപത്രിയില്‍ പ്രവേശിപ്പിച്ചു. പടക്കശാല പൂര്‍ണമായി കത്തി നശിച്ചു.
അനധികൃതമായി പ്രവര്‍ത്തിക്കുകയായിരുന്ന പടക്ക നിര്‍മാണ ശാലയാണ് പൊട്ടിത്തെറിച്ചത് എന്നാണ് പ്രാഥമിക റിപ്പോര്ട്ട്. ദീപാവലിയോടനുബന്ധിച്ച് പടക്കങ്ങള്‍ വിപണിയില്‍ എത്തിക്കാനായി തിരക്ക്‌ പിടിച്ച്‌ പടക്കനിര്‍മ്മാണം നടത്തി വരുന്നതിനിടെയാണ് അപകടം. മരണസംഖ്യ ഇനിയും ഉയരുമെന്നാണ്‌ സൂചന. പൊള്ളലേറ്റ പലരുടേയും നില ഗുരുതരമാണ്‌. പലര്‍ക്കും 80 ശതമാനത്തിലധികം പൊള്ളലേറ്റിട്ടുണ്ടെന്നാണ്‌ റിപ്പോര്‍ട്ടുകള്‍.
മരിച്ചവരിലും പരിക്കേറ്റവരിലും കൂടുതലും സ്‌ത്രീകളാണെന്നാണ്‌ റിപ്പോര്ട്ട്. പോലീസും ഫയര്‍ഫോഴ്‌സും സ്‌ഥലത്ത്‌ രക്ഷാപ്രവര്‍ത്തനം നടത്തുന്നുണ്ട്‌. നേരത്തേയും ഇത്തരം സംഭവം ഉണ്ടായ സാഹചര്യത്തില്‍ അനധികൃത പടക്കനിര്‍മ്മാണ ശാലകള്‍ കണ്ടെത്താന്‍ നേരത്തേ തമിഴ്‌നാട്‌ കമ്മീഷനെ നിയമിച്ചിരുന്നു..
