കോണ്ഗ്രസിന്റേത് വീരസ്യം പറച്ചിലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്. യുദ്ധം ചെയ്യാനുള്ള കെല്പ്പൊന്നും കേരളത്തിലെ കോണ്ഗ്രസിനില്ല. കോണ്ഗ്രസുകാര് മാത്രമാണ് സില്വര്ലൈന് പദ്ധതിയെ എതിര്ക്കുന്നത്. കേരളത്തിലെ ബഹുഭൂരിപക്ഷം ജനങ്ങളും പദ്ധതിക്കനുകൂലമാണെന്നും ഇത്തരത്തില് പദ്ധതിയെ എതിര്ക്കുന്ന കോണ്ഗ്രസുകാര് ഒറ്റപ്പെടുമെന്നും കോടിയേരി ബാലകൃഷ്ണന് മാധ്യമങ്ങളോട് പറഞ്ഞു. ഒരു സര്വേക്കല്ലെടുത്ത് മാറ്റിയത് കൊണ്ട് കെ-റെയില് പദ്ധതി ഇല്ലാതാകില്ലെന്നും അദ്ദേഹം കൂട്ടിച്ചേര്ത്തു.
കെ-റെയില് പദ്ധതിക്കെതിരായ സമരം ശക്തമാക്കുമെന്ന് കെ.പി.സി.സി അധ്യക്ഷന് കെ. സുധാകരന് ചൊവ്വാഴ്ച മാധ്യമങ്ങളോട് പറഞ്ഞിരുന്നു. കോടതി വിധി പോലും മാനിക്കാതെ സ്ഥാപിച്ച കെ-റെയില് കല്ലുകള് പിഴുതെറിയുമെന്നും അദ്ദേഹം തിരുവനന്തപുരത്ത് നടത്തിയ വാര്ത്താസമ്മേളനത്തില് പറഞ്ഞു.