തിരുവനന്തപുരത്ത് നിന്ന്‍ പുറപ്പെട്ട എമിറേറ്റ്സ് എയര്‍ലൈന്‍സ് വിമാനം ദുബൈ വിമാനത്താവളത്തില്‍ ഇടിച്ചിറക്കി. അപകടത്തില്‍ വിമാനത്തിന് തീ പിടിച്ചെങ്കിലും യാത്രക്കാരെ സുരക്ഷിതമായി ഒഴിപ്പിച്ചു. ബുധനാഴ്ച പ്രാദേശിക സമയം 12.45-നാണ് സംഭവം ഉണ്ടായത്.
ബോയിംഗ് 777 വിമാനമാണ് ദുബൈ അന്താരാഷ്ട്ര വിമാനത്താവളത്തില്‍ അപകടത്തില്‍ പെട്ടത്. പിന്‍ഭാഗം ഇടിച്ചിറങ്ങിയ വിമാനത്തിന്റെ വലതുവശത്ത് തീ പിടിച്ചു. എന്നാല്‍, തീ പടരുന്നതിന് മുന്‍പ് 282 യാത്രക്കാരെയും 18 വിമാന ജീവനക്കാരെയും ഒഴിപ്പിച്ചതായി അധികൃതര്‍ അറിയിച്ചു.
