സമൂഹമാധ്യമത്തിലൂടെ അശ്ലീല പ്രചാരണം നടത്തിയ ഡോ.വിജയ് പി നായര്ക്കെതിരെ പ്രതികരിച്ച സംഭവത്തില് ഭാഗ്യലക്ഷ്മിക്ക് പിന്തുണയുമായി ഫെഫ്ക. ഭാഗ്യലക്ഷ്മിയുടെ പ്രതികരണം നിഷ്ക്രിയമായ നിയമവ്യവസ്ഥയുടെ കരണത്തേറ്റ അടിയാണെന്ന് ഫെഫ്ക പ്രതികരിച്ചു. പ്രതിഷേധത്തില് പങ്കെടുത്ത ഭാഗ്യലക്ഷ്മി അടക്കമുള്ളവര്ക്കെതിരെ ജാമ്യമില്ലാ വകുപ്പുകള് ചുമത്തിയ പൊലീസ് നടപടി ശരിയായില്ലെന്നും ഫെഫ്ക അറിയിച്ചു.
യൂട്യൂബറായിരുന്ന വിജയ് പി നായരെ ഭാഗ്യലക്ഷ്മി, ശ്രീലക്ഷ്മി അറക്കല്, ദിയ സന എന്നിവര് ചേര്ന്നാണ് മര്ദ്ദിച്ചത്. വിജയ് താമസിക്കുന്ന ലോഡ്ജിലെത്തിയ മൂവരും വിജയിയെ മര്ദ്ദിക്കുകയും ദേഹത്ത് കരിയോയില് ഒഴിക്കുകയും മാപ്പുപറയിക്കുകയും ചെയ്യിച്ചിരുന്നു. പിന്നീട് വിജയ് പി നായരുടെ പരാതിയില് ഭാഗ്യലക്ഷ്മിക്കെതിരെ പോലീസ് മോഷണം കുറ്റം ഉള്പ്പെടെയുള്ളവ ചുമത്തി കേസ് രജിസ്റ്റര് ചെയ്തിരുന്നു.സംഭവം വിവാദമായതോടെ ഭാഗ്യലക്ഷ്മിക്കും സുഹൃത്തുക്കള്ക്കും പിന്തുണയുമായി നിരവധി പ്രമുഖര് രംഗത്തെത്തിയിരുന്നു.