കേരളം ഉള്പ്പെടെ അഞ്ച് സംസ്ഥാനങ്ങളില് നിയമസഭാ തിരഞ്ഞെടുപ്പ് തീയതികള് പ്രഖ്യാപിച്ചു. കേരളത്തില് ഏപ്രില് ആറിന് ഒറ്റഘട്ടമായി തിരഞ്ഞെടുപ്പ് നടക്കുമെന്ന് മുഖ്യ തിരഞ്ഞെടുപ്പ് കമ്മീഷണര് സുനില് അറോറ വാര്ത്ത സമ്മേളനത്തില് അറിയിച്ചു. മേയ് രണ്ടിനാണ് വോട്ടെണ്ണല്. കുഞ്ഞാലിക്കുട്ടി രാജിവച്ചതോടെ ഒഴിവുവന്ന മലപ്പുറം ലോക്സഭാ മണ്ഡലത്തിലേക്കുള്ള ഉപതിരഞ്ഞെടുപ്പും ഇതിനൊപ്പം നടക്കും.
സംസ്ഥാനത്ത് ഇന്ന് മുതല് പെരുമാറ്റച്ചട്ടം നിലവില്വന്നു. മാര്ച്ച് 12 ന് തിരഞ്ഞെടുപ്പ് വിജ്ഞാപനം വരും. പത്രികകളുടെ സൂക്ഷ്മ പരിശോധന മാര്ച്ച് 20ന്. പത്രിക പിന്വലിക്കാനുള്ള അവസാന തീയതി മാര്ച്ച് 22നാണ്.
തമിഴ്നാട്ടിലും പുതുച്ചേരിയിലും ഏപ്രില് ആറിനാണ് തിരഞ്ഞെടുപ്പ്. അസമില് മാര്ച്ച് 27, ഏപ്രില് ഒന്ന്, ആറ് തീയതികളിലായി മൂന്ന് ഘട്ടമായാണ് വോട്ടെടുപ്പ്. ബംഗാളില് എട്ട് ഘട്ടമായാണ് തിരഞ്ഞെടുപ്പ് നടക്കുക (മാര്ച്ച് 27, ഏപ്രില് 1,6,10,17,22,26,29). എല്ലായിടത്തും മേയ് രണ്ടിനാണ് വോട്ടെണ്ണല്.
കൊവിഡ് മുന്കരുതല് നടപടിയുടെ ഭാഗമായി കേരളത്തില് ബൂത്തുകളുടെ എണ്ണം 40,771 ആയി വര്ധിപ്പിച്ചു. കഴിഞ്ഞ തവണ 21,498 ബൂത്തുകളാണ് ഉണ്ടായിരുന്നത്. പോളിങ് സമയം ഒരു മണിക്കൂര് വര്ധിപ്പിച്ചു. രാവിലെ ഏഴ് മുതല് വൈകീട്ട് ഏഴ് വരെയാണ് പോളിങ്. ഒരു മണ്ഡലത്തില് ചെലവഴിക്കാവുന്ന തുക 30.8 ലക്ഷം രൂപയാണ്.
കേരളത്തിലെ 140 മണ്ഡലങ്ങള് ഉള്പ്പെടെ അഞ്ച് സംസ്ഥാനങ്ങളിലെ 824 അസംബ്ലി മണ്ഡലങ്ങളിലേക്ക് തിരഞ്ഞെടുപ്പ് നടക്കുക. 18 കോടി 86 ലക്ഷം വോട്ടര്മാര് വിധിയെഴുതും. 80 വയസിന് മുകളിലുള്ളവര്ക്ക് തപാല് വോട്ട് അനുവദിക്കുമെന്നും തിരഞ്ഞെടുപ്പ് കമ്മീഷന് അറിയിച്ചു.