കൊച്ചിയിലെ ഷോപ്പിങ് മാളില് യുവനടിയെ അപമാനിച്ച സംഭവത്തില് നടിയോട് മാപ്പ് പറയാന് തയ്യാറാണെന്നും നിയമോപദേശം കിട്ടിയതുകൊണ്ടാണ് ഒളിവില് പോയതെന്നും മലപ്പുറം പെരിന്തല്മണ്ണ സ്വദേശികളായ പ്രതികള്. പ്രതികള് ഉടന് കീഴടങ്ങിയേക്കും. നടിയെ പിന്തുടരുകയോ അപമാനിക്കുകയോ ചെയ്തിട്ടില്ലെന്നും ദുരുദ്യേശത്തോടെയല്ല കൊച്ചിയില് എത്തിയതെന്നും അവര് പറഞ്ഞു.
വ്യാഴാഴ്ച വൈകീട്ടാണ് കേസിനാസ്പദമായ സംഭവം. കുടുംബത്തോടൊപ്പം കൊച്ചിയിലെ മാളില് എത്തിയ തന്നെ രണ്ട് ചെറുപ്പക്കാര് അപമാനിച്ചെന്നും ശരീരത്തില് സ്പര്ശിച്ച ശേഷം പിന്തുടര്ന്നുവെന്നും നടി സാമൂഹിക മാധ്യമത്തിലൂടെയാണ് വെളിപ്പെടുത്തിയത്. ഇത് ശ്രദ്ധയില്പ്പെട്ട കൊച്ചി സിറ്റി പോലീസ് കമ്മിഷണര് വിജയ് സാഖറെ അന്വേഷണം നടത്താന് കളമശ്ശേരി പോലീസിന് നിര്ദേശം നല്കുകയായിരുന്നു.
സംഭവം വലിയ വിവാദമായ കാര്യം ഇന്നലെയാണ് അറിഞ്ഞതെന്നും തുടര്ന്ന് പെരിന്തല്മണ്ണയിലെ ഒരു അഭിഭാഷകനെ പോയി കാണുകയും ചെയ്തുവെന്ന് യുവാക്കള് പറയുന്നു. ഈ അഭിഭാഷകന്റെ നിര്ദേശം അനുസരിച്ചാണ് ഇവര് ഒളിവില് പോയത്. പോലീസിന് മുന്പില് കീഴടങ്ങാന് തയ്യാറാണെന്നാണ് യുവാക്കളുടെ നിലപാട്.