നടിയെ ആക്രമിച്ച കേസില് വിചാരണ കോടതി മാറ്റണമെന്നാവശ്യപ്പെട്ട് സര്ക്കാരും നടിയും നല്കിയ ഹര്ജികള് ഹൈക്കോടതി തള്ളി. വിചാരണ കോടതി മാറ്റുന്നത് തെറ്റായ കീഴ്വഴക്കം സൃഷ്ടിക്കുമെന്ന് ഹൈക്കോടതി സിംഗിള് ബെഞ്ച് നിരീക്ഷിച്ചു. കോടതിയും പ്രോസിക്യൂഷനും ഒരുമിച്ച് പോകണമെന്ന് ഹൈക്കോടതി നിര്ദേശിച്ചു. സിംഗിള് ബെഞ്ച് ജഡ്ജി വി.ജി.അരുണിന്റേതാണ് ഉത്തരവ്. തിങ്കളാഴ്ച മുതല് വിചാരണ പുനഃരാരംഭിക്കാം. നേരത്തെ വാദം കേള്ക്കുന്നതിന്റെ ഭാഗമായി ഹൈക്കോടതി വിചാരണയ്ക്ക് സ്റ്റേ ഏര്പ്പെടുത്തിയിരുന്നു.
വിചാരണ കോടതി പക്ഷപാതപരമായി പെരുമാറുന്നുവെന്നും മാനസിക പീഡനം നേരിടേണ്ടി വന്നെന്നും നടി കോടതിയില് വ്യക്തമാക്കിയിരുന്നു. വിചാരണ നടപടികള് മറ്റൊരു കോടതിയിലേക്ക് മാറ്റണമെന്നാവശ്യപ്പെട്ടാണ് സര്ക്കാരും നടിയും ഹൈക്കോടതിയില് ഹര്ജി നല്കിയത്. പ്രതിഭാഗത്തെ 20-ഓളം അഭിഭാഷകര് കോടതിമുറിയില് വെച്ച് മാനസികമായി തേജോവധം ചെയ്യുന്നുവെന്നാണ് നടി പരാതി നല്കിയത്. പ്രധാനപ്പെട്ട പല മൊഴികളും കോടതി രേഖപ്പെടുത്തിയില്ല എന്ന ഗുരുതര ആരോപണവും ഹര്ജിയിലുണ്ടായിരുന്നു. നടിയുടെ പരാതി പിന്തുണച്ച സര്ക്കാരും കേസില് രഹസ്യവിചാരണയെന്ന നിര്ദേശം അട്ടിമറിക്കപ്പെട്ടെന്ന് വ്യക്തമാക്കിയിരുന്നു.