നിയമ വിദ്യാര്ഥിനി ആലുവ കീഴ്മാട് എടയപ്പുറം കക്കാട്ടില് വീട്ടില് മൊഫിയ പര്വീണ് (21) ആത്മഹത്യ ചെയ്ത കേസില് പോലീസിന്റെ റിമാന്ഡ് റിപ്പോര്ട്ട് പുറത്ത്. ഭര്തൃവീട്ടുകാര്ക്കെതിരെ മൊഫിയയുടെ മാതാപിതാക്കള് ഉന്നയിച്ച ആരോപണങ്ങള് ശരിവെക്കുന്നതാണ് റിപ്പോര്ട്ട്.
ഭര്തൃവീട്ടില് മൊഫിയ നേരിട്ടത് കൊടിയ പീഡനമാണെന്ന് റിമാന്ഡ് റിപ്പോര്ട്ടില് പറയുന്നു. ഭര്ത്താവും മാതാപിതാക്കളും അടിമയെ പോലെയാണ് മൊഫിയയെ കൊണ്ട് ജോലി ചെയ്യിപ്പിച്ചിരുന്നത്. ഭര്തൃമാതാവ് സ്ഥിരമായി ഉപദ്രവിച്ചിരുന്നു. ഭര്ത്താവ് സുഹൈല് ലൈംഗിക വൈകൃതത്തിന് അടിമയാണ്. പലതവണ ഇയാള് മൊഫിയയുടെ ശരീരത്തില് മുറിവേല്പ്പിച്ചിട്ടുണ്ട്. മൊഫിയയെ മാനസിക രോഗിയായി ഭര്തൃവീട്ടുകാര് മുദ്രകുത്തിയിരുന്നതായും റിപ്പോര്ട്ടില് ചൂണ്ടിക്കാട്ടുന്നു. 40 ലക്ഷം രൂപ സ്ത്രീധനമായി സുഹൈലും വീട്ടുകാരും ആവശ്യപ്പെട്ടിരുന്നു. പണം നല്കാത്തതിനെ തുര്ന്നാണ് പീഡനം തുടര്ന്നതെന്നും റിപ്പോര്ട്ടില് പറയുന്നു.