പുരാവസ്തു തട്ടിപ്പ് കേസ് പ്രതി മോന്സണ് മാവുങ്കലുമായി ബന്ധമുണ്ടന്ന് ക്രൈം ബ്രാഞ്ച് കണ്ടെത്തിയ ഐ.ജി ലക്ഷ്മണക്ക് സസ്പെന്ഷന്. സസ്പെന്ഷന് ഉത്തരവില് മുഖ്യമന്ത്രി ഒപ്പിട്ടു. പുരാവസ്തു തട്ടിപ്പ് കേസില് മോന്സണ് മാവുങ്കലുമായി ഐ.ജി ലക്ഷ്മണക്ക് ബന്ധമുണ്ടന്ന് ക്രൈം ബ്രാഞ്ചാണ് കണ്ടത്തിയത്. ലക്ഷ്മണയുടെ പങ്ക് വ്യക്തമാക്കുന്ന ക്രൈംബ്രാഞ്ച് അന്വേഷണ റിപ്പോര്ട്ട് മുഖ്യമന്ത്രിക്ക് കൈമാറിയിരുന്നു. ഇതേ തുടര്ന്നാണ് സസ്പെന്ഷന്.
മോന്സണ് മാവുങ്കലിന്റെ പുരാവസ്തു തട്ടിപ്പ് കേസില് ഐജി ലക്ഷ്മണക്കെതിരെ ശക്തമായ തെളിവുകള് പുറത്ത് വന്നിട്ടുണ്ട്. മോന്സന്റെ പുരാവസ്തു തട്ടിപ്പില് ഐജി ഇടനിലക്കാരന് ആയെന്നാണ് മൊഴി. പുരാവസ്തു ഇടപാടിന് ആന്ധ്രാ സ്വദേശിനിയെ മോന്സണ് പരിചയപ്പെടുത്തിക്കൊടുത്തത് ഐജി ലക്ഷ്മണയാണ്. മോന്സന്റെ കൈവശം ഉള്ള അപൂര്വ്വ മത്സ്യങ്ങളുടെ സ്റ്റഫ്, മുതലയുടെ തലയോട്, അടക്കം ഇടനിലക്കാരി വഴി വില്പ്പന നടത്താന് പദ്ധതി ഇട്ടെന്നും കണ്ടെത്തിയിട്ടുണ്ട്. മോന്സണെതിരേ ചേര്ത്തല പോലീസ് രജിസ്റ്റര് ചെയ്ത കേസ് ക്രൈംബ്രാഞ്ചിന് കൈമാറിയത് വീണ്ടും ലോക്കല് പോലീസിനുതന്നെ കൈമാറുന്നതിനായി ലക്ഷ്മണ് ഇടപെട്ടതിന്റെ രേഖകള് പുറത്തുവന്നിരുന്നു.
ഐജി ലക്ഷ്മണയുടെ നേതൃത്വത്തില് തിരുവനതപുരം പോലീസ് ക്ലബ്ബില് ഇടനിലക്കാരിയും മോന്സനും കൂടിക്കാഴ്ച്ച നടത്തിയെന്നും കണ്ടെത്തി. ഓഗസ്റ്റ് അഞ്ചിനായിരുന്നു കൂടിക്കാഴ്ച. പോലീസ് ക്ലബ്ബില് ഐ.ജി ആവശ്യപ്പെട്ടത് പ്രകാരം മോന്സന്റെ വീട്ടില് നിന്ന് പുരാവസ്തുക്കള് എത്തിച്ചു. ഐ.ജി പറഞ്ഞയച്ച പോലീസ് ഉദ്യോഗസ്ഥന് ആണ് ഇത് കൊണ്ട് പോയത്. ഇടപാടിന് മുന്പ് പുരാവസ്തുക്കളുടെ ചിത്രം മോന്സന്റെ ജീവനക്കാര് ഇടനിലക്കാരിക്ക് അയച്ചു കൊടുത്തതായും വ്യക്തമായിട്ടുണ്ട്. ഇടപാടുകളുടെ വാട്സ്ആപ് ചാറ്റുകള് പുറത്ത് ആയിട്ടുണ്ട്.