കോഴിക്കോട് നോര്ത്തില് ചലച്ചിത്ര സംവിധായകന് രഞ്ജിത്ത് എല്.ഡി.എഫ് സ്ഥാനാര്ഥിയാകും. സിറ്റിങ് എംഎല്എ എ. പ്രദീപ് കുമാറിന് പകരമാണ് രഞ്ജിത്തിനെ പരിഗണിക്കുന്നത്. മത്സരിക്കാന് തയ്യാറാണെന്ന് രഞ്ജിത് സി.പി.എം നേതൃത്വത്തെ അറിയിച്ചു. പാര്ട്ടിക്ക് പുറത്തുള്ള പൊതുസമ്മതരെ കൊണ്ടുവരുന്നതിന്റെ ഭാഗമാണ് രഞ്ജിത്തിന്റെ പേര് സി.പി.എം പരിഗണിച്ചത്. ഇടതുപക്ഷ സഹയാത്രികന് കൂടിയാണ് രഞ്ജിത്.
പ്രദീപ് കുമാറടക്കം കോഴിക്കോട് ജില്ലയിലെ സി.പി.എമ്മിന്റെ നാല് സിറ്റിങ് എം.എല്.എമാരും ഇത്തവണ മത്സര രംഗത്തുണ്ടാകില്ല. ഇതുസംബന്ധിച്ച് സി.പി.എം ജില്ലാ സെക്രട്ടറിയേറ്റില് ധാരണയായെന്നാണ് വിവരം.
കെ.എസ്.യു അധ്യക്ഷന് അഭിജിത്തിനെയാണ് യു.ഡി.എഫ് കോഴിക്കോട് നോര്ത്തില് പരിഗണിക്കുന്നത്. ബി.ജെ.പിക്കായി എം.ടി.രമേശ് മത്സരത്തിനിറങ്ങുമെന്നും സൂചനയുണ്ട്.