രാജ്യത്തെ മികച്ച 100 കോളേജുകളുടെ പട്ടികയില്‍ 23-ാം സ്ഥാനത്ത് തിരുവനന്തപുരം യൂണിവേഴ്‌സിറ്റി കോളേജ്. കേരളത്തിലെ ഏറ്റവും മികച്ച കോളേജും യൂണിവേഴ്‌സിറ്റി കോളേജാണ്. സൗകര്യങ്ങളും സമൂഹത്തിലുള്ള മതിപ്പും പരിഗണിച്ചാണ് മാനവ വിഭവശേഷി മന്ത്രാലയത്തിന്റെ നാഷണല്‍ ഇന്‍സ്റ്റിറ്റിയൂഷണല്‍ റാങ്കിംഗ് ഫ്രെയിംവര്‍ക്ക് (എന്‍.ഐ.ആര്‍.എഫ്) റാങ്കുകള്‍ നിശ്ചയിക്കുന്നത്.
ഗവേഷണ വിദ്യാര്‍ത്ഥികള്‍ ഉള്‍പ്പെടെ ഉള്ളവരുടെ എണ്ണം, അധ്യാപക-വിദ്യാര്‍ത്ഥി അനുപാതം, പ്രസിദ്ധീകരണങ്ങളും നിലവാരവും, പി.എച്ച.ഡി ബിരുദമുള്ള അധ്യാപകരുടെ എണ്ണം, ബജറ്റ് വിനിയോഗം, വിദ്യാര്‍ത്ഥികളുടെ ഉപരി പഠനം, ജോലി സാധ്യത, പേറ്റന്റുകള്‍, പെണ്‍ക്കുട്ടികളുടെ ശതമാനം, ഇതര സംസ്ഥാനങ്ങളില്‍ നിന്നും രാജ്യങ്ങളില്‍ നിന്നുമുള്ള വിദ്യാര്‍ത്ഥികളുടെ എണ്ണം, മല്‍സരക്ഷമത, ഭിന്നശേഷിക്കാരായ വിദ്യാര്‍ത്ഥികള്‍ക്കുള്ള സൗകര്യങ്ങള്‍ എന്നിവ കൂടി പരിഗണിച്ചാണ് റാങ്കുകള്‍ നിശ്ചയിക്കുന്നത്.
തിരുവനന്തപുരത്തെ 5 കോളേജുകളാണ് മികച്ച 100 കോളേജുകളുടെ പട്ടികയില്‍ ഇടം നേടിയത്. ഗവണ്‍മെന്റ് വനിതാ കോളേജ്, മാര്‍ ഇവാനിയോസ്, എം.ജി കോളേജ്, ഗവണ്‍മെന്റ് ആര്‍ട്‌സ് കോളേജ് എന്നിവയാണ് അത്. വനിതാ കോളേജ് 40-ാം സ്ഥാനത്തും മാര്‍ ഇവാനിയോസ് 48-ാം സ്ഥാനത്തും എം.ജി കോളേജ് 93-ാം സ്ഥാനത്തും ഗവണ്‍മെന്റ് ആര്‍ട്‌സ് കോളേജ് 98-ാം സ്ഥാനത്തുമാണ്. ആകെ വിദ്യാഭ്യസ സ്ഥാപനങ്ങളുടെ പട്ടികയില്‍ 42-ാം സ്ഥാനം കേരള സര്‍വകലാശാല നേടി.